மும்பையில் பிரேஸில் அணி

17 ஆவது ஜூனியர் (17 வயதுக்கு உட்பட்டவர்களுக்கான) உலகக்கிண்ண   உதைபந்தட்டப்போட்டி  அடுத்த மாதம் (அக்டோபர்) 6 ஆம்  திகதி  முதல் 28 ஆம் திகதி வரை கொல்கத்தா, கொச்சி, டெல்லி, மும்பை, கவுகாத்தி, கோவா ஆகிய 6 நகரங்களில் நடைபெறும்.   இதில் பங்கேற்கும் 24 அணிகள் 6 பிரிவாக பிரிக்கப்பட்டுள்ளன. லீக் ஆட்டங்கள் முடிவில் ஒவ்வொரு பிரிவிலும் முதல் இரண்டு இடங்களை பிடிக்கும் அணிகள் மற்றும் 3 ஆவது இடத்தை பெறும் அணிகளில் சிறப்பான 4 அணிகளும் அடுத்த சுற்றுக்கு (ரவுண்ட் 16) முன்னேறும். தொடக்க நாளான 6 ஆம் திகதி டெல்லியில் நடைபெறும் லீக் ஆட்டங்களில் ‘ஏ’ பிரிவில் இடம் பெற்றுள்ள கொலம்பியா-கானா (மாலை 5 மணி), இந்தியா-அமெரிக்கா (இரவு 8 மணி) அணியும், மும்பையில் நடைபெறும் லீக் ஆட்டங்களில் ‘பி’ பிரிவில் இடம் பிடித்துள்ள நியூஸிலாந்து-துருக்கி (மாலை 5 மணி), பராகுவே-மாலி (இரவு 8 மணி) அணியும் மோதுகின்றன.

இந்த நிலையில் ஜூனியர் உலக கோப்பை போட்டியில் பங்கேற்கும் 3 முறை சம்பியனான பிரேஸில் அணி நேற்று காலை மும்பையைச்சென்றடைந்தது. அந்தேரியில் நாளை நடைபெறும் பயிற்சி ஆட்டத்தில் பிரேஸில்  அணி, நியூஸிலாந்துடன் மோதுகிறது. முதல் நாளில் மும்பையில் நடைபெறும் 2 லீக் ஆட்டங்களுக்கான டிக்கெட்டுகள் 20 ஆயிரம் விற்பனையாகிவிட்டான.   போட்டி தொடங்க இன்னும் 10 நாட்கள் இருப்பதால் எல்லா டிக்கெட்டுகளும் விற்று தீர்ந்து விடும் என்று எதிர்பார்க்கப்படுகிறது. போட்டி நடைபெறும் ஸ்டேடியம் மொத்தம் 45,000 பேர் அமர்ந்து பார்க்கும் வசதி கொண்டதாகும்.