உலகக் கிண்ண போக்குவரத்துச் செலவை பீபா ஏற்க வேண்டும்

 

உலகலாவிய ரீதியில்  பயணச்சீட்டு விலைகள் அதிகரித்தமை கவலையாக இருக்கும் நிலையில், 2026  பீபா உலகக் கிண்ணப் போட்டிக்கு முன்னதாகப் போக்குவரத்துச் செலவுகள் ஒரு புதிய முக்கியப் பிரச்சினையாக உருவெடுத்துள்ளன. முக்கிய விளையாட்டு மைதானங்களுக்கான இரயில் கட்டணங்கள் திடீரென உயர்ந்துள்ளதாகக் கூறப்படுவது, அரசியல் ரீதியான எதிர்ப்பைத் தூண்டியுள்ளது. இந்தச் செலவை பீபா தான் ஏற்க வேண்டும் என்று அமெரிக்கச் சட்டமியற்றுபவர்கள்  வேண்டுகோள் விடுத்துள்ளனர்.

உலகக் கிண்ண  போட்டி நாட்களில், மன்ஹாட்டனிலிருந்து மெட்லைஃப் ஸ்டேடியத்திற்குச் செல்லும் இரயில் கட்டணங்கள் வழக்கமான $12.90-ஐ விட $100-ஐத் தாண்டக்கூடும் என்று ஒரு அறிக்கை தெரிவித்தது. பாஸ்டனிலும் இதேபோன்ற கட்டண உயர்வுகள் சுட்டிக்காட்டப்பட்டுள்ளன; அங்கு சிறப்புச் சேவைகளுக்கான கட்டணம் $20-க்கு பதிலாக $80 ஆக இருக்கலாம்.

ஒரு உலகளாவிய நிகழ்விற்காக உள்ளூர்வாசிகள் அதிக விலையைச் செலுத்தக் கூடாது என்று வாதிட்ட சக் ஷுமர், போக்குவரத்துச் செலவுகளை ஏற்குமாறு பீபாவுக்கு  பகிரங்கமாக வேண்டுகோள் விடுத்துள்ளார்.

நியூயார்க் ஆளுநர் கேத்தி ஹோச்சுலும் இந்த அதிக விலையைக் கேள்விக்குள்ளாக்கியதோடு, மலிவு விலை , அனைவருக்கும் எளிதில் கிடைக்கும் தன்மைக்கு அழைப்பு விடுத்தார்.

இந்த வாதம் அதன் அளவு மற்றும் வருவாயை அடிப்படையாகக் கொண்டது. இந்தப் போட்டியின் மூலம் பீபா சுமார் 11 பில்லியன்  டொலர் வருவாய் ஈட்டும் என கணிக்கப்பட்டுள்ளது. 

 அமெரிக்க ந‌கரங்கள் ஏற்கனவே உள்கட்டமைப்பு தளவாடங்களில் பெருமளவில் முதலீடு செய்துள்ளன. ரசிகர்களும் தினசரி பயணிகளும் உயர்த்தப்பட்ட பொதுப் போக்குவரத்துக் கட்டணங்களை எதிர்கொள்ளக் கூடாது. முதன்மைப் பயனாளியான பீபா, அந்த நிகழ்வு தொடர்பான செயல்பாட்டுச் செலவுகளை ஏற்க வேண்டும் என  பொது மக்களும் கருத்துத் தெரிவித்துள்ளனர்.

விலை இன்னும் இறுதி செய்யப்படவில்லை என்றும், 100 டொலர் பயணச்சீட்டுகள் குறித்த செய்திகள் யூகத்தின் அடிப்படையிலானவை என்றும் என்.ஜே. டிரான்சிட் அதிகாரிகள் தெரிவித்துள்ளனர். இருப்பினும், மெட்லைஃப் ஸ்டேடியத்தில் போட்டிகளுக்கான சேவைகளை இயக்குவதற்கு சுமார் 48 மில்லியன்  டொலர்கள் செலவாகலாம் என உள்ளக மதிப்பீடுகள் தெரிவிக்கின்றன.

நியூ ஜெர்சி ஆளுநர் மிக்கி ஷெரில், இந்தச் செலவுகளை வரி செலுத்துவோர் ஏற்க மாட்டார்கள் என்று கூறியுள்ளார். இதனால், விலைகளுக்கு வரம்பு விதிக்கப்பட்டால் நிதிப் பற்றாக்குறை ஏற்பட வாய்ப்புள்ளது.

 பாஸ்டனில், போட்டி நாளன்று ஜில்லெட் ஸ்டேடியத்திற்குச் செல்லும் பயணக் கட்டணங்கள் நான்கு மடங்கு அதிகரிக்கக்கூடும் என மசாசூசெட்ஸ் பே போக்குவரத்து ஆணையம் தெரிவித்துள்ளது.