தமிழ் மக்கள் நெருக்கடி சரியாகப் பதியப்படவில்லை ஓவியர் மருது

                                                    {யோ.நிமல்ராஜ் - தினக்குரல்}

தமிழ் மக்களுக்கு ஏற்பட்ட நெருக்கடி சரியான முறையில் பதிவு செய்யப்படவில்லை.வெறும் வார்த்தைகளால் அந்த நெருக்கடியை பதிவு செய்வது போதுமானதொன்றல்ல. தமிழர் நெருக்கடி தொடர்பாக வெளித்தோற்றத்தில்  காணப்படும் விடயங்கள் மாத்திரமே இதுவரை பதிவாகியுள்ளன. ஆழ்மட்டத்தில் காணப்படும் பிரச்சனைகள் சரியான முறையில் பதிவாகவில்லையென இந்தியாவின் பிரபல ஓவியரும் பல்துறை விற்பன்னருமான ட்ராஸ்கி மருது கூறினார்.

அண்மையில் இலங்கைக்கு வருகை தந்த ஓவியரும் கலை இயக்குநருமானமருது  வடமராட்சி வதிரி தமிழ் மன்றத்தில் நடைபெற்ற மக்கள் சந்திப்பொன்றில் கலந்து கொண்டு கருத்துத்தெரிவிக்கும் போதே  இவ்வாறு குறிப்பிட்டார்.

ஆவணப்படுத்தலின் அவசியம் தொடர்பாக இவ்வாறு கூறிய அவர் தனது ஓவியப்பயணம் இலங்கையுடனான தொடர்பு உள்ளிட்ட விடயங்கள் தொடர்பாக தொடர்ந்து தெரிவிக்கையில்:

ஓவியப் பயணம்

ஆரம்பத்தில் வீடுகளில் சாறிகள் நெய்யப்படும்போது அவற்றினை மத்திய அரசாங்கம் மாநியங்களை வழங்கி கொள்வனவு செய்யும் அவ்வாறான காலப்பகுதியில் நாம் பல்வேறு வடிவங்களை அதாவது தமிழ்க் கலாசாரத்தை பிரதிபலிக்கும் வடிவங்களை அந்த சாறிகளில் பொறிக்கவேண்டிய பணியினை தொடர்ந்திருந்தோம்.

 அதேபோல பல்வேறு நூதனசாலைகளில் காணப்படும் ஓவியங்களை வேறு இடங்களிலும் காட்சிப்படுத்துவதற்காக மீண்டும் வரையவேண்டிய தேவையிருந்தது. அதற்காக என்னைப்போன்ற பலரை அரசாங்கம் பணிக்கமர்த்தியிருந்தது. பல்வேறு இடங்களிலும் காணப்பட்ட சிற்பங்கள், ஓவியங்கள் அவற்றின் பெறுமதி அழிந்துவிடாமல் காப்பதற்காக அதேபோன்ற உருவங்களையும் ஓவியங்களையும் நாம் வடிவமைத்து மக்களிடத்தில் அவற்றைக் கொண்டுசேர்த்தோம்.

இந்தப் பணியைத் தொடர்ந்து 10 ஆண்டுகளின் பின்னர் பத்திரிகைத் துறையில் ஆர்வம் செலுத்தினேன் அது எனது விருப்பமாகவும் இருந்தது. சிறிய பத்திரிகைகள் தேசிய பத்திரிகைகள்,  ஆனந்தவிகடன்,  குமுதம் போன்ற சஞ்சிகைகளில் பணியாற்றுவுதற்கு சந்தர்ப்பம் கிடைத்தது. அந்தக் காலப்பகுதியில் சினிமாவும் ஆர்வம் ,கணினி வருவதற்கு முன்னரான காலப்பகுதியில் தந்திரக் காட்சிகளை உருவாக்குவதில் ஓவியர்களின் பங்கு அதிகமாக காணப்பட்ட காரணத்தினால் அவ்வாறான திரைப்படங்களுக்கு காட்சியமைப்புக்களை உருவாக்கிக் கொடுப்பதில் கவனத்தை செலுத்திவந்தேன். இவ்வாறான சினிமா, பத்திரிகை இரண்டும் கலந்ததாக கிட்டத்தட்ட 30 வருடங்கள் அந்தத் துறைகளில் பணியாற்ற முடிந்தது.

தொடர்ந்து சுதந்திர ஊடகவியலாளராக பல்வேறு பத்திரிகைகளுக்கு செயலாற்றியிருந்தேன். 1980 ஆம் ஆண்டில் கணினிகள் வருகைதருவதற்கு ஆரம்பித்த காலப்பகுதியில் அதனைத் தேடி கணினி மூலமான கிரபிக்ஸ் வடிவங்களை அமைப்பதற்கு கற்றுக்கொண்டேன். அதன்பின்னர் சினிமாவில் அதிக ஆர்வத்தினை செலுத்தி அதற்குரிய காட்சியமைப்புக்களை வடிவமைப்பதற்கு சந்தர்ப்பம் கிடைத்தது.

தொடர்ந்து தனியார் தொலைக்காட்சிகளுக்காக அசையும் காட்சிகளை வடிவமைக்கும் பணி கிடைத்தது. கிட்டத்தட்ட 6 உதவியாளர்களுடன் புதுயுகம் தொலைக்காட்சிகளுக்காக அந்தப் பணிகளை மேற்கொண்டிருந்தேன்.  4 1/2 வருட காலப்பகுதியில் 22 படங்களை புதுயுகம் தொலைக்காட்சி சேவைக்காக நாம் உருவாக்கினோம்   அதனைத் தொடர்ந்து மீண்டும் சினிமாவில் கவனம் செலுத்தி வருகிறேன்.

இலங்கைக்கான வருகையின் காரணம்

முன்னரும் இலங்கைக்கு வருகை தந்திருந்தேன். தற்பொழுது மட்டக்களப்பில் நடைபெறும் கருத்தரங்கொன்றிற்காக வருகைதந்திருந்தேன். தமிழகத்தில் ஒரு விடயத்திற்காக நீண்டகாலமாகப் போராடி வருகின்றோம். அதாவது சகல கலைகளையும் ஒரே பல்கலைக்கழத்தில் கற்பிக்க வேண்டும் என்ற ஒரு கோரிக்கையை முன்வைத்து நாம் போராடி வருகின்றோம்.

இன்னொரு துறையை கற்கின்ற ஒருவர் மற்றக் கலைகள் தொடர்பாகவும் அறிந்துகொள்வதற்கு சாதகமான சூழ்நிலையை இவ்வாறான பல்கலைக்கழம் ஏற்படுத்திக் கொடுக்கும். ஆனால்,  மட்டக்களப்பில் இவ்வாறான பல்கலைககழகம் உள்ளது. அதனை மேலும் நெறிப்படுத்த வேண்டுமென்று ஆலோசித்துவருகின்றோம். குறிப்பாக வீடியோ, அனிமேஷன், படத்துடனான கதை, சர்வதேச ரீதியில் படத்துடனான கதை பிரபலமான ஒன்று. எழுத்துடனும் ஓவியத்துடனும் இணைந்து கதைகளை கூறிச்செல்லும் முறை. இவ்வாறான மாற்றங்களை இந்தக் கல்வித் திட்டங்களில் உட்புகுத்த வேண்டுமென்று மட்டக்களப்பில் வலியுறுத்தியிருந்தேன். கல்வி கற்கும் மாணவருக்கு சர்வதேச ரீதியில் முன்னேற்றம் அடைந்து தொழில் ரீதியான வாய்ப்புக்களை ஏற்படுத்திக் கொடுக்கும்.

தமிழர் நெருக்கடி

 தமிழ் மக்களுக்கு ஏற்பட்ட நெருக்கடி சரியான முறையில் ஆவணங்களில் பதிவாகவில்லை. வெறும் வார்த்தைகளாக அந்த நெருக்கடியினை பதிவு செய்வது போதுமான ஒன்றல்ல. தொடுபரப்பு அல்லது மேற்பரப்பில் காணப்படம் விடயங்கள் மட்டுமே இதுவரை பதிவாகியுள்ளன. அடிமட்டத்தில் உள்ளே காணப்படும் பிரச்சினைகள் பதிவாகியிருக்கவில்லை.

போருக்குப் பின்னரான காலப்பகுதியில் கலைஞர்கள் தமது படைப்புக்கள் மூலமாக எவ்வாறான விடயங்களை கூறவேண்டுமென்பதில் மிகவும் கவனமாக இருக்க வேண்டும். பொய்யான விடயங்களை எந்தச் சந்தர்ப்பத்திலும் அவர்கள் கூறிவிடக்கூடாது. எந்தக் கோணத்தில் எவ்வாறான கருதுகோளுடன் கலைஞர்கள் தமது படைப்புக்களை வெளிப்படுத்த வேண்டுமென்பதில் உறுதியாக இருக்க வேண்டும். மற்றக் கலைவடிவங்கள் அதற்கு எவ்வாறு துணைபுரியும் என்பதையும் ஆராய்ந்து பார்க்கவேண்டும்.

 பத்திரிகைகள் அழிந்துவிடும்

எதிர்வரும் காலத்தில் செய்திப் பத்திரிகைகள் அழிந்துவிடும். எந்தவிதமான சந்தேகங்களும் இல்லை. இன்று தொலைக்காட்சிகளில் பல நிகழ்ச்சிகளை பார்க்கின்றனர். ஆனால் ஒரு குடும்பத்திலுள்ள அனைவரும் சேர்ந்து ஒரு நிகழ்ச்சியை பார்ப்பதற்கு நேரம் கிடைப்பதில்லை.

 பயணிக்கும் போது கூட தனித்தனியா ஒவ்வொரு சாதனங்களில் வெவ்வேறுபட்ட சினிமாக்களையோ நிகழ்ச்சிகளையோ நாம் பார்க்கின்றோம். செய்தித் தாள்களில் இறந்த செய்திகளே (பழைய செய்திகளே) கூடுதலாக காணப்படுகின்றன. சமூக ஊடகங்கள் உடனடியாக ஒரு செய்தியை கூறும் நிலை ஏற்பட்டுள்ளது. செய்திப் பத்திரிகைகளில் தயாரிக்கப்பட்ட செய்திகளே கூடுதலாக காணப்படுகின்றது. ஆனால் சமூக ஊடகங்கள் ஒரு தொடர்பினைக் கொண்டிருக்கின்றன. உடனுக்குடன் அவை தெளிவுபடுத்தப்படுகின்றன.

 இவ்வாறான நிலையில், ஊடகங்கள் எவ்வாறு பயணிக்கின்றன. தொடர்பாடல் எவ்வாறு காணப்படுகின்றது. என்பதனை ஆராய்ந்து அடுத்த தலைமுறையினரும் இவற்றினை தொடரும் வகையில் பாடத்திட்டங்களில் உள்வாங்கப்படவேண்டும்.

இவ்வாறான நிலையில் அனைத்துக் கலைகளும் இலங்கையில் ஒரு பல்கலைக்கழத்தின் கீழ் கற்பிக்கப்படுகின்றமை மகிழ்ச்சியான விடயம். இதற்காக தமிழகத்தில் 90 ஆம் ஆண்டிலிருந்து பல போராட்டங்களை முன்னெடுத்துவருகின்றோம். ஆனால் அது நடைபெறவில்லை. இவ்வாறான கட்டமைப்புடனான கல்வி இலங்கையில் தொடருமாக இருந்தால் இன்னும் ஒரு சில வருடங்களில் இதன்பெறுபேறு அர்த்தம் நிறைந்த விளைவுகளை ஏற்படுத்தும். மட்டக்களப்பிலுள்ள மாணவர்களைப் பார்த்து உரையாடியமை மிகவும் மகிழ்ச்சியான விடயமாகவே நான் கருதிக்கொள்கிறேன்.

கொல்வின் ஆர்.டி சில்வா   என்.எம்.பெரேரா  அரசியல் தஞ்சம்

ஆனால், இலங்கைக்கும் எனது தந்தைக்கும் இடையில் நெருக்கிய உறவு காணப்படுகின்றது. அதுஎவ்வாறெனில் எனது தந்தை 14 ஆவது வயதில் காந்தி ஆச்சிரமத்துக்கு சென்றார். காந்தியுடன் அந்த ஆச்சிரமத்தில் இருந்தார். மத்திய இந்தியாவிலிருக்கும் அந்த ஆச்சிரமத்தில் 16 ஆவது வயதில் வீட்டைவிட்டு ஓடிப்போய் எனது தந்தை அங்கு ஒருவருட காலப்பகுதிக்கு தங்கியிருந்தார். இந்தச் சந்தர்ப்பத்தில் காந்தியும் அங்கிருந்தார்.

பின்னர் அவர் மீண்டும் மதுரைக்கு அழைத்துவரப்பட்டார். இவ்வாறான நிலையில் அரசியல் தஞ்சம் கோரி கொல்வின் ஆர்.டி சில்வாவும், என்.எம்.பெரேராவும் தப்பி இந்தியாவுக்கு வந்தார்கள். அவர்கள் அங்கு அஞ்சாதவாசத்தினை மேற்கொண்டிருந்தது மதுரையில். என்னுடைய தந்தையார் தான் மதுரையில் ஒரு வீட்டில் தங்கவைத்திருந்தார்.

அங்கிருந்து சென்னைத் துறைமுகம் , மும்பைத் துறைமுகத்திற்கு சென்று தொழிற்சங்க வேலைகளில் அவர்கள் ஈடுபட்டிருந்தார்கள். அவர்கள் இலங்கையிலிருந்து இந்தியாவுக்கு தப்பிவரும்போது பெண்வேடம் போட்டு வருகை தந்திருந்தார்கள். தொழிற்சங்க செயற்பாடுகளில் ஈடுபட்டிருந்தாலும், அவர்கள் எங்கு தங்கியிருந்தார்கள் என்பதனை யாரும் அறிந்திருக்கவில்லை. எனது தகப்பனார் அவர்களுடன் இருந்தார். இதன்காரணமாகவே ட்ராஸ்கி என்ற பெயர் எனக்கு சூட்டப்பட்டிருந்தது.

இதேநேரம், கொல்வின் ஆர்.டி சில்வா  என்.எம்.பெரேரா இந்தியாவில் தலைமறைவு வாழ்க்கையை தொடர்ந்தபோது அவர்களில் ஒருவருக்கு திலக் என்ற பெயர் வைக்கப்பட்டிருந்தது. அதன் காரணமாகவே எனது இளைய சகோதரனுக்கு திலக் என்ற பெயர் வைக்கப்பட்டிருந்தது. அந்தக் காரணத்தை அன்றைய சந்தர்ப்பத்தில் எம்மால் உணரமுடியவில்லை. இன்று எம்மால் அதனை விளங்கிக் கொள்ள முடிகின்றது. அந்த இருவரின் நினைவாகவே அந்தப்பெயர் தந்தையால் வைக்கப்பட்டது.

யாழ்ப்பாணத்துடனான உறவு

 அதேபோல, யாழ்ப்பாணத்துடனும் எனது குடும்பத்திற்கு நெருங்கிய தொடர்பு காணப்பட்டது. ராமசாமி என்பவர் எனது தந்தையாருடன் ஆழமான நீண்டதொடர்பினை கொண்டிருந்தார். எனது தந்தைக்கு முன்னர் ராமசாமி இறந்த செய்தி எனக்குக் கிடைத்தது. ஆனால் அவர்கள் இருவரிடையிலும் காணப்பட்ட நட்புக் காரணமாக அந்த தகவலை எமது தந்தைக்கு நாங்கள் கூறியிருக்கவில்லை. 6 மாதங்களின் பின்னரே அந்தத் தகவலை கூறியிருந்தோம். ஆனால் நீங்கள் எனக்கு கூறவில்லையானாலும் அவரது மரணத்தை என்னால் உணரமுடிந்தது என தந்தை என்னிடம் குறிப்பிட்டிருந்தார்.

ராஸ்கியைப் பற்றிய புத்தகம் ஒன்றினை ராமசாமிதான் எழுதியிருந்தார். தந்தையாரிடமிருந்த தகவல்களின் அடிப்படையில் அந்த நூல் எழுதப்பட்டது. ஆனால், தமிழில் அது வெளியாகியிருக்கவில்லை.

எனது தந்தை இறந்தபோது எஸ்பொ. வருகைதந்திருந்தார். இந்தச் சந்தர்ப்பத்தில் அவரும் நினைவுகூர்ந்திருந்தார். எனது தந்தையாரைப் பற்றி எஸ்.பொ. எழுதியபோது என்.எம்.பெரேரா, கொல்வின் ஆர். டி சில்வா ஆகியோரின் தலைமறைவு வாழ்க்கைக்கு தமிழர்களே உதவியாக குறிப்பிட்டதுடன், பின்னர் அவர்கள் தமிழர்களின் எதிரிகளாக மாறிவிட்டதையும் சுட்டிக்காட்டியுள்ளார்.

இவர்களின் தலைமறைவு வாழ்க்கை தொடர்ந்த நிலையில், அவர்களின் இருப்புக்கு அங்கு அச்சுறுத்தல் ஏற்பட்டது. அந்தச் சந்தர்ப்பத்தில் பொலிஸார் உட்பட பல்வேறு தரப்பினரின் அழுத்தங்களை எதிர்நோக்க வேண்டிய நிலையேற்பட்டது.

இவ்வாறான நிலையில் அவர்கள் அங்கிருந்து வெளியேற வேண்டிய நிலையேற்பட்டபோது எனது தந்தையாரிடம் கூறிவிட்டுச் செல்வதற்காக வீட்டிற்கு வருகைதந்தபோது தந்தையார் வீட்டில் இருக்காத நிலையில் எனது பூட்டியாரிடம் பயணத்தை கூறிவிட்டு சென்றிருந்தார்கள். அந்தச் சந்தர்ப்பத்திலும் பொலிஸார் வருகை தந்தபோது பூட்டியார் கூட அவர்களை பாதுகாத்ததாக கூறப்படுகிறது.

மரபு ரீதியான ஓவியங்களும் சமகால ஓவியங்களும்

கேள்வி ; உணர்வு ரீதியான விடயங்களை வெளிப்படுத்த பொருத்தமான முறை சமகால ஓவியங்களா மரபுரீதியிலான ஓவியங்களா?

பதில் :சமகால ஓவியங்கள் எவ்வாறான வடிவத்திலும் காணப்படலாம். ஆனால் அவை உண்மையானதாக இருக்கவேண்டும். சமகால ஓவியத்தினை மக்கள் ஏற்றுக்கொள்ள வேண்டும். படைப்பாளன் அதனை உணர்ந்து உண்மையாக அந்தப் படைப்பினை வெளிப்படுத்த வேண்டும். ஆனால்இ இந்த சமகாலத்தை ஓவியத்தை படைப்பதாக இருந்தாலும்இ புலமை ரீதியாக அடிப்படை விடயங்களை அறிந்து அதனைக் கற்றுக்கொள்ள வேண்டிய தேவையுள்ளது. கல்வியியல் ஒழுக்கம் சகல விடயங்களுக்கும் அவசியமானது. இவை அனைத்திலும் பின்னர்தான் ஓவிய வடிவங்களை எம்மால் மாற்றிக்கொள்ள முடியும்.  உருவத்தைத் தெரியாமல் அருவத்தை வரைய முடியாது.  சும்மா கிறுக்குவது ஓவியமாகிவிடமுடியாது. அதேபோல் பார்வையாளர்களும் பயிற்சி பெற்றவர்களாக இருக்கவேண்டும். பார்த்தவுடன் சில ஓவியங்களை விளங்கிக் கொள்ள முடியாது. ஆழமாக நோக்கிய பின்னரே ஓவியங்களின் ஆழமான அர்த்தத்தை விளங்கிக்கொள்ள முடியும். கடுமையான பயிற்சியை தவிர்த்து தற்கால ஓவியத்துக்கு சென்றுவிட முடியாது.

அடிப்படை கல்வி ஒழுக்கங்கள் இன்றி சரியான பயிற்சி இல்லாமல் சமகால ஓவியங்களை வரைவதன் மூலம் முழுமையான அர்த்தத்தினை வெளிப்படுத்த முடியாது. ஓவியங்களை அவ்வாறு வரையலாம் ஆனால் ஒரு சில நாட்களில் அந்தப் படைப்பாளர் ஒதுங்கிச் செல்லவேண்டிய நிலையேற்படும்.

தொடர்புகொள்வதற்கு பல்வேறு வழிமுறைகள் உள்ளன. அவ்வழிமுறைகளை சரியாக கற்றுக்கொண்டு தொடர்பினை ஏற்படுத்தினால்தான் இருவருக்கிடையிலான தொடர்பினை ஏற்படுத்திக் கொள்ள முடியும்.

கேள்வி ; கணனி ஓவியங்கள் கிராபிக்ஸ் வளர்ச்சிகாரணமாக எதிர்காலத்தில் கை ஓவியங்கள் மறந்துவிடும் சாத்தியம் உள்ளதா?

பதில் : கணனி ஓவியங்களால் மரபு ரீதியான ஓவியங்கள் அழியவோ மறைய்யஅவோ போவதில்லை. கணனி ஒரு சாதனம் நாம் கூறுவதனை செய்கின்றது.மனிதர்களின் அறிவின் மூலமே அதுவும் செயற்படுகின்றத்கு.கணனிகள் பணிகளை சுருக்குகின்றன. ஆனால் மனித புலமையே அதற்கு பயன்படுகின்றது.எந்த சந்தர்ப்பத்திலும் அது தொடர்ந்து செயற்படுகின்றது. ஆனால் உண்மையான மென்பொருள் என்பது மனிதர்கள் மட்டுமே.

ரஜினியின் அரசியல் விளையாட்டு

 தமிழ் சினிமாவில் அசைக்கமுடியாத சக்தியாகத் திகழும் ரஜினிகாந்தின் குரல் அவ்வப்போது அரசியல் அரங்கிலும் அதிர்வலைகளை ஏற்படுத்தி வருகிறது.சினிமா என்ற மாய உலகில் யாருமே எட்டமுடியாத உச்சத்தில் இருக்கும் ரஜினி அரசியலிலும் உச்சத்தை எட்ட வேண்டும் என்பது அவரது ரசிகர்களின் விருப்பம்  தமிழக அரசியலும் சினிமாவும் ஒன்றுடன் ஒன்று பின்னிப்பிணைந்துள்ளன.தமிழ் சினிமாவில் வெற்றி பெற்றவர்கள் தமிழக அரசியலிலும் கால்பதித்துள்ளார்கள். அண்ணாத்துரை,கருணாநிதி, எம்.ஜி.ஆர், ஜெயலலிதா ஆகியோர் சினிமாவில் இருந்து அரசியலுக்குள் நுழைந்து தமிழக முதலமைச்சரானவர்கள்.தமிழ் சினிமாவில் கோலோச்சியவர்கள் இந்திய நாடாளுமன்ற உறுப்பினராகவும் தமிழக சட்ட மன்ற  உறுப்பினராகவும் தெரிவாகி மக்களுக்குச் சேவையாற்றினார்கள்.அரசியல் ஆசையில் கட்சி ஆரம்பித்த நடிகர்கள் இடையில் காணாமல் போய்விட்டார்கள்.

திரைப் படங்களில் அரசியல்வாதிகளின் ஊழல்களை வெளிச்சத்துக்குக் கொண்டுவந்து மக்களின் அபிமானத்தைப் பெற்ற ரஜினி அரசியலிலும் அதேபோன்று செய்வர் என அவரது ரசிகர்கள் நம்பிக்கை வைத்துள்ளனர். கருணாநிதி அரசியலில்  கால் பாதித்தபோது பெரியாரின் தலைமையில் அண்ணாவின் தம்பியாகச் செயற்பட்டார். அண்ணா மறைந்ததும் முதலமைச்சரானார். கருணாநிதியின் தலைமையில் அரசியலில் அரசியலில் ஜொலித்த எம்.ஜி.ஆர்,திராவிட முன்னேற்றக் கழகத்தில் இருந்து வெளியேற்றப்பட்டார். அண்ணா திராவிட முன்னேற்றக் கழகத்தை ஆரம்பித்து முதலமைச்ரானார்.

எம்.ஜி.ஆரி ஜோடியாக சினிமாவில் அறிமுகமான ஜெயலலிதா, அரசியலில் எம்.ஜி.ஆரின் வழியைப் பின்பற்றினார். எம்.ஜி.ஆரின் ரசிகர்கள் ஜெயலலிதாவுக்கு ஆதரவு தெரிவித்தனர். அரசியலின் நெளிவு சுழிவுகளை கற்றுக்கொண்ட ஜெயலலிதா, எம்.ஜி.ஆரின் மறைவுக்குப் பின்னர்  தமிழகத்தின் முதலமைச்சரானார்.கருணாநிதி, எம்.ஜி.ஆர், ஜெயலலிதா ஆகிய மூவரும் முதலமைச்சர் கனவுடன் அரசியலுக்கு வரவில்லை.களமும் சூழ்நிலையும் அவர்களை முதலமைச்சராக்கியது. அண்மைக்காலமாக அரசியலுக்கு வருபவர்கள் அனைவரும் முதலமைச்சராவதற்கு ஆசைப்படுகிறார்கள்;. ரஜினியும் இதற்கு விதிவிலக்கல்ல.

கட்சித் தொண்டர்களாக இருந்தவர்கள்தான் அரசியல் தலைவர்களாக உருவெடுத்தார்கள். ரஜினியின் அரசியல் பிரவேசம் இதற்கு நேர் மாறானது. முதலமைச்சர் என்ற அந்தஸ்துடன் அவர் அரசியல் பிரவேசம் செய்ய வேண்டும் என அவரது ரசிகர்கள் எதிர்பார்க்கிறார்கள். தமிழக அரசியல் கட்சிகளில் ரஜினியின் ரசிகர்கள் இருக்கிறார்கள். ரஜினி அரசியல் கட்சி ஆரம்பித்தால் அவர்கள் அக்கட்சிகளில் இருந்தது வெளியேறிவிடுவார்கள். ரஜினி ரசிகர்களின்  வெளியேற்றம் அக் கட்சிகளின் வெற்றிவாய்ப்பைப் பாதிக்குமா என்பதை உடனடியாகக் கணிக்க முடியாது.

ரஜினியின் ரசிகர்களில் அதிகமானோர் அறுபது வயதைக் கடந்தவர்களாக இருக்கிறார்கள். இன்று ரஜினியை ரசிப்பவர்கள் தேர்தலில் அவருக்காக வேலை ஊக்கத்துடன் செய்வார்களா என்பதை உறுதியாகச்சொல்ல முடியாது. அரசியல் கட்சியை ஆரம்பிப்பதற்கான சகல ஆயத்தங்களையும் செய்தபின்னர்தான் ரஜினி தனது ரசிகர்களைச் சந்தித்தார்.  ரசிகர்களை அவர் முன்பு சந்தித்தபோது அரசியல் பற்றி எதுவும் பேசவில்லை. கடந்த வாரம் ரசிகர்களைச்சந்தித்த ரஜினி அரசியல் பற்றியும் அரசியல் தலைவர்கள் பற்றியும் பேசி உள்ளார்.

தமிழக அரசியலில் பலமான ஒரு தலைவர் இல்லாத நிலை உள்ளது. இரும்புப்பென்மணி ஜெயலலிதா மறைந்து விட்டார். உடல் நிலை பாதிக்கப்பட்டதால் அரசியல் சாணக்கியர் கருணாநிதியின் குரல் அடங்கி விட்டது. தலைமை இல்லாத அண்ணா திராவிட முன்னேற்றக் கழகம் பல தலைவர்களால் வழி நடத்தப்படுகிறது. ஸ்டாலின் மட்டும் அரசியல் களத்தில் பம்பரமகச் சுழல்கிறார். மற்றைய தலைவர்கள் அறிக்கையை வெளியிட்டு விட்டு அமைதியாக இருக்கிறார்கள். இந்த இடை வெளியை நிரப்புவதற்கு பாரதீய ஜனதாக் கட்சி   காய் நகர்த்துகிறது. அக் கட்சியால்  வெற்றி பெற முடியவில்லை.

 ரஜினியை வளைப்பதற்கு பாரதீய ஜனதாத்  தலைவர்கள் பல தடவை முயற்சி செய்தனர். ரஜினியின் வீட்டுக்கு பிரதமர் மோடியும் வேறுபல தலைவர்களும் சென்று ரஜினி தமது பக்கம் என்ற மாயையை உருவாக்கப் பார்த்தனர். ரஜினி எதற்கும் மசிந்து கொடுக்கவில்லை டெல்லியில் உள்ள காங்கிரஸ் கட்சித் தலைவர்களை விட பாரதீய ஜனதாக் கட்சியின்  தலைவர்களுடன் ரஜினிக்கு நெருக்கம் அதிகம். தமிழகத்தில் கருணாநிதி, மூப்பனார் ஆகிய இரண்டு தலைவர்கள் மீதும் ரஜினி மிகுந்த மதிப்பும் மரியாதையும் வைத்துள்ளார். அரசியல் கட்சிகளை கடுமையாக விமர்சித்த காலம்  சென்ற சோவின் ஆலோசனையையும் ரஜினி வழிநடத்தியது.

திரைப்படங்களில் அரசியல் வசனம் பேசி கைதட்டல் வாங்கிய ரஜினி, பாட்ஷாபட  வெற்றி விழாவில் பகிரங்கமாக அரசியல் பேசி ஜெயலலிதாவின் எதிர்ப்பைச்சம்பாதித்தார். கருணாநிதியும் மூப்பனாரும் இணைந்து தேர்தலில் போட்டியிட்ட போது அந்தக் கூட்டணியின் வெற்றிக்காகக் குரல் கொடுத்தார். அந்தத் தேர்தலில் ரஜினி குரல் கொடுத்த கூட்டணி வெற்றி பெற்றது.. அப்போது ரஜினியின் குரலுக்குக் கிடைத்த வெற்றியாகவே அந்த வெற்றி கருதப்பட்டது. ஜெயலலிதாவின் கோபப்பார்வையில் இருந்து கருணாநிதியும் மூப்பனாரும் ரஜினியைக் காப்பாற்றிய உண்மை மழுங்கடிக்கப்பட்டது. அதன் பின்னர் நடைபெற்ற தேர்தல்களிலும் ரஜினியின்  குரல் ஒலித்தது..ஆனால்,அந்தக்குரலுக்கு உரிய மதிப்பும் மரியாதையும் கிடைக்கவில்லை.

பாபா படம் வெளியானபோது ராமதாஸின் தலைமையிலான பாட்டாளி மக்கள் கட்சி ரஜினிக்கு எதிராக போராட்டம் நடத்தியது. அப்போது நடைபெற்ற  இந்திய நாடாளுமன்றத் தேர்தலில் திராவிட முன்னேற்றக் கழகத்துடன் பாடாளி மக்கள் கட்சி கூட்டணி அமைத்ததால் ரஜினிகாந்த் அண்ணா திராவிட முன்னேற்றக் கழகத்துக்கு வாக்களித்தார். அந்தத் தேர்தலில் திராவிட முன்னேற்றக் கழகக் கூட்டணி தமிழகத்தின் சகல தொகுதிகளிலும் வெற்றி பெற்றது. அப்போதும் ரஜினியின் குரல் மதிப்பிழந்தது.தமிழகத்தில் தேர்தல் நடைபெறும்போது அரசியல் தலைவர்களும் வேட்பாளர்களும் ரஜினியைச் சந்திப்பதை வழக்கமாகக் கொண்டுள்ளனர். எல்லா வேட்பாளர்களுடனும் சிரித்தபடி போஸ் கொடுப்பார் .கொள்கை அற்ற அரசியல் ஆதரவளராக ரஜினி நோக்கப்படுகிறார். 

தமிழக அரசியலில் இக்கட்டான நேரத்தில் ரஜினி குரல் கொடுத்ததில்லை. இலங்கைத் தமிழர்கள் பற்றிய ரஜினியின் பார்வை வெளிப்படையானதாக இல்லை. முல்லைப்பெரியாறு, கர்நாடகத்துடனான காவிரி நீரப் பங்கீடு போன்ற பிரச்சினைகளில் ரஜினி  அதிகமாக ஆர்வம் காட்டியதில்லை. சென்னையை வெள்ளம் புரட்டியபோது சினிமாவில் உள்ளவர்கள் களத்தின் நின்று உதவி செய்தார்கள். புதிய நோட்டுகளை அறிமுகப்படுத்திய மோடியின் அரசாங்கம் பழைய நோட்டுகளை செல்லாது என அறிவித்தபோது. மக்கள் எதிர்ப்புத் தெரிவித்தனர். அதற்கு ஆதரவு தெரிவித்த ரஜினி  புதிய இந்தியா பிறந்துவிட்டது என அறிவித்தார்.

சினிமாப் பிரபலங்கள் தமது ரசிகர்களுக்கும் கஷ்டப்பட்டவர்களுக்கும் உதவி செய்கிறார்கள். கமல் நற்பணி மன்றம் உடலுறுப்பு தானம் செய்துள்ளது.  நடிகை ஹன்சிகா அநாதைக் குழந்தைகளைத் தத்தெடுத்து வளர்க்கிறார். .ராகவா லாரன்ஸ் செய்யும் உதவிகள் அளப்பரியது.அகரம் என்ற அறக்கட்டளையின் மூலம் சிவகுமார், சூர்யா கார்த்திக் ஆகியோர் அள்ளி அள்ளிக் கொடுக்கிறார்கள். விஜய் தனது ரசிகர்களை அவ்வப்போது ஆச்சரியப்படுத்துகிறார். இந்த வரிசையில் ரஜினி என்ன செய்தார் என்ற கேள்விக்கு பதில் கிடைக்கவில்லை.

உள்ளாட்சித் தேர்தலில் தனது ரசிகர்களைக் களம் இறக்கி நோட்டம் பார்த்து கட்சியை ஆரம்பிக்கும் திட்டத்தில் ரஜினி இருப்பதாகக்கூறப்படுகிறது. கட்சியின் பெயர் இன்றி ரஜினியின் ஆசிபெற்ற  என்ற அறிமுகத்துடன் வேட்பாளர்கள் போட்டியிடுவார்கள். உள்ளாட்சித் தேர்தலின் முடிவின் பின்னர் புதிய கட்சி பற்றிய அறிவிப்பு  வெளியாகும். இந்திய மத்திய அரசும் தமிழக அரசும் ரஜினியின் அரசியல் பிரவேசம் பற்றிய புலனாய்வுத் தகவல்களைச் சேகரிக்கத் தொடங்கியுள்ளன.

கருணாநிதிக்கும் மூப்பனாருக்கும் ஆதரவாகக் குரல் கொடுத்ததை அரசியல் விபத்து எனக் கூறி பிராயச்சித்தம் தேடி உள்ளார் ரஜினி. அந்தச்சம்பவம் நடைபெற்று இரண்டு தசாப்தங்கள் கடந்தபின்னர் ரஜினிக்கு ஞானம்  பிறந்துள்ளது. ரஜினியின் அரசியல் பிரவேசம் தமிழகத்தில் அதிர்வலைகளை ஏற்படுத்தும் என்பதில் சந்தேகம் இல்லை. அரசியல் பற்றி வெளிப்படையாகப்பேசி  போருக்குத் தயாராகுமாறு ரசிகர்களுக்கு  சமிக்ஞை காட்டியுள்ளார். பணம் சம்பாதிக்கும் ஆசை உள்ளவர்களை சேர்க்கமாட்டேன் என ரஜினி உறுதியளித்துள்ளார். அரசியல் என்றால் பொதுச்சேவை என்ற எண்ணம் ஒருகாலத்தில் இருந்தது. பணம் சம்பாதிப்பதில் குறியாக உள்ளவர்கள்  இன்று அரசியலை ஆக்கிரமித்துள்ளார்கள். உண்மையான சமூக நோக்கம் கொண்ட அரசியல்வாதிகளை ரஜினி எப்படித் தெரிவு செய்வர் எனத் தெரியவில்லை.

ரஜினியின் அரசியல் பிரவேசத்தை சிலர் வரவேற்கிறார்கள். சிலர் கடுமையாக எதிர்க்கிறார்கள். அரசியல் கட்சிகளைச்சேராத நடுநிலையான வாக்களர்களைக் கவர  வேண்டிய கட்டாயம் ரஜினிக்கு உள்ளது.  கட்சித் தலைமையால் ஓரங்கட்டப்பட்டவர்கள் ரஜினியின் பக்கம் திரும்பியுள்ளனர்.தமிழருவி மணியன்  ரஜினியைச் சந்தித்ததால் புதிய திருப்பம் ஏற்பட்டுள்ளது.  திராவிட முன்னேற்றக் கழகத்துக்கும் அண்ணா திராவிட முன்னேற்றக் கழகத்துக்கும்  மாற்றீடாக‌ மக்கள் நலக் கூட்டணியை  அமைப்பதில் பெரும் பங்காற்றிய  தமிழருவி மணியன், ரஜினியைச் சந்தித்ததால் சில கட்சிகள் ரஜினியுடன் சேர வாய்ப்பு உள்ளது.

பச்சைத் தமிழன் என ரஜினி தன்னை அறிவித்ததால் அவரது அவரது அரசியல் ஆசை வெளிச்சத்துக்கு வந்துள்ளது.

வர்மா

பலே பலே பாகுபலி

பாகுபலியை  கட்டப்பா ஏன் கொலை செய்தான்? என்ற ஒற்றை வரிக் கேள்விக்கு இரண்டு வருடங்களின் பின்னர் விடை கிடைத்துள்ளது. இந்த இரண்டு வருடங்களில் பலரும் பல பலகோணங்களில் சிந்தித்து விடை பகன்றனர்.   முதலாவது பாகுபலியின்  பிரமாண்டம் மனதைவிட்டு இன்னமும் நீங்கவில்லை. அந்த இடத்தில் இரண்டாவது  பாகுபலியும் இடம் பிடித்துவிட்டது. இந்திய சினிமாவில் பிரமாண்டத்தின்  ஆரம்பம் சந்திரலேகா. நவீன தொழில் நுட்பங்களுடன் பிரமாண்டமான பல திரைப்படங்கள் வெளியாகிவிட்டன. பிரமாண்டம் என்ற மையப் புள்ளி சந்திரலேகாவில்   இருந்துதான் ஆரம்பமாகிறது  சந்திரலேகாவுக்குப் பின்னர்  பிரமாண்டம் என்றால் பாகுபலி ஒன்று, பாகுபலி இரண்டு என இரண்டு படங்களும் வரலாற்றில் இடம் பிடித்துவிட்டன.

திரைக்கதை,வசனம்,நடிப்பு,எடிட்டிங்,இசை,பாடல்கள், இயக்கம்,தயாரிப்பு, உடை, கலை என பட்டியலிடும் அனைத்தும் பிரமாண்டம் தான். இரண்டாவது பாகுபலியின் ஆரம்பத்தில் முதலாவது பாகுபலியின் கதையை  ஞாபகப்படுத்தும் உத்தி மிக அருமையானது. பாகுபலி ஒன்றில் மகனின் கதையையும் பாகுபலி இரண்டில் தகப்பனின் கதையையும் சிக்கலின்றி மிகத் தெளிவாகத் தந்துள்ளார். பாகுபலியின் கதையை நகர்த்தும் முக்கிய கதாபத்திரமான கட்டப்பாவாக சத்தியராஜ் மகிழ்மதி நாட்டுக்கும் பாசத்துக்கும்  இடையில் சிக்கித் தவிக்கும் ராஜமாதா சிவகாமியாக ரம்யா கிருஷ்ணன், அப்பா மகன் இரட்டை வேடத்தில் பாகுபலியாக பிரபாஸ், அப்பாவையும் மகனையும் எதிர்த்து ஆட்சியைப் பிடிக்கும் பல்வாள் தேவனாக ராணா டகுபதி, பல்வாள் தேவனின் தகப்பன்  இடது கை சூம்பிய சகுனியாக நாசர்,  குந்தள தேசத்து யுவராணி   தேவசேனாவாக அனுஷ்கா, அனுஷ்காவின் மாமன்  மாறவர்மனாக சுப்பராஜ், இவர்களுடன் ரோகினி ,தமனா ஆகியோரும் தமது பாத்திரங்களை உணர்ந்து நடித்துள்ளனர்.

ரஜினியை எதிர்த்த நீலாம்பரியாக ரசிகர்களின் மனதில் காலுக்கு மேல்  கால் போட்டு அமர்ந்திருக்கும் ரம்யா கிருஷ்ணன் ராஜமாதாவாக ஜொலிக்கிறார். தில்லான மோகனம்பாள் என்றால் பத்மினி நினைவுக்கு வருவது போல்  நீலாம்பரி, சிவகாமி என்றால் ரம்யா கிருஷ்ணன் தான் மனதில் தோன்றுவார். ராஜ குடும்பத்து விசுவாசமாக நடக்கும் கட்டப்பாவை பல்வாள் தேவனும் அவரது தகப்பனும் நாய் என்றுதான் அழைக்கிறார்கள். முதல் வெளியான பாகுபலியில் வயது போன தேவசேனையாக  ரசிகர்களின் பரிதபத்துக்கு ஆளான அனுஷ்கா அழகு தேவதையாக மிளிர்கிறார்.

காளகேயருடனான் போரில் வெற்றி வாகை சூடிய பாகுபலியை அரசனாகவும் பல்வாள் தேவனை தளபதியாகவும் ராஜமாதா  அறிவிக்கிறார். மக்களின் பிரச்சினைகளை அறிவதற்காக பாகுபலி பிற தேசங்களுக்குச் செல்கிறார்.  பாகுபலிக்குத் துணையாக கட்டப்பா  செல்கிறார். குந்தள தேசத்தில் கொள்ளையரின் அட்டகாசத்தை அடக்கும் யுவராணி தேவசேனாவைக் கண்டு பாகுபலி மயங்குகிறார். பயந்தவர் போல் நடிக்கும் பாகுபலிக்கும் கட்டப்பாவுக்கும் உதவி செய்ய தனது நாட்டுக்கு அழைத்துச்செல்கிறார்  தேவதேனா.    . தொடை நடுங்கியான மாறவர்மனிடம் பாகுபலி யுத்தப் பயிற்சி பெறுகிறார்.  தேவசேனாவின்  அழகிய படத்தைக் கண்டு காமம்  தலைக்கேறிய பல்வாள் தேவன், தேவசேனாவை பாகுபலி காதலிப்பதை அறிந்தும் அவளைத் தனக்கு மணமுடித்துத் தரும்படி ராஜமாதாவிடம் கேட்கிறார். ராஜமாதா சம்மதிக்கிறார்.

பொன்னும் பொருளும் கொடுத்து தேவசேனாவைப்  பெண் கேட்கிறார் ராஜமாதா. அதனை அவமானமாகக் கருதிய  தேவசேனா கோபத்துடன் பதில்  கடிதம் அனுப்புகிறார்  அதனால் சீற்றமடைந்த ராஜமாதா, தேவசேனாவைக்கைது செய்யும்படி உத்தரவிடுகிறார். குந்தள தேசத்தில் பாகுபலி இருப்பதை அறிந்த ராஜமாதா அவருக்குத் தகவல் அனுப்புகிறார். குந்தள தேசத்தை கொள்ளைக்காரர்கள்  தாக்கியபோது பாகுபலி தீரமுடன் போராடி அவர்களைத் துவம்சம் செய்கிறார். பாகுபலியின் வீரத்தைக் கண்டு தேவசேனா திகைத்து நின்றபோது கட்டப்பா உண்மையை கூறுகிறார்.

 பாகுபலியின் காதலை கட்டப்பா பகிரங்கப்படுத்த அனைவரும் சந்தோஷப்படுகின்றனர். பறவை கொண்டுவந்த தகவலின் மூலம் தேவசேனாவைக் கைது செய்வதாக பாகுபலி தெரிவிக்கிறார். அதற்கு தேவசேனா சம்மதிக்கவில்லை. தேவசேனாவின்   மானத்துக்கும் கற்புக்கும் எதுவிட பங்கமும் ஏற்படாது என பாகுபலி உத்தரவாதமளித்ததால் தேவசேனா கைதியாகச் செல்ல ஒப்புக்கொல்கிறார்.

மகிழ்மதி  நாட்டுக்கு அரசனாக யார் முடிசூடியது?. தேவசேனா யாரைத் திருமணம் செய்தார்? கட்டப்பா எதற்காக பாகுபலியைக் கொன்றார்? தேவசேனாவுக்குக் கொடுத்த வாக்கை பாகுபலி  காப்பாற்றினாரா? போன்ற கேள்விகளுக்கு சிக்கலின்றி  விடை தருகிறார் ராஜமெளலி.

மதம் பிடித்த யானையை பாகுபலி அடக்குவது. யானையின் மேல் பாகுபலி ஏறுவது.யானையின் மீது இருந்து அம்பு எய்வது.தீச்சட்டியைத் தலையில் வைத்துச்செல்லும் ராஜமாதா  திரும்பிப்பார்த்து கண்ணால் புன்னகைப்பது. பன்றி வேட்டை, .சண்டையின் தேவசேனாவுக்கு பாகுபலி அம்பு எய்யப் பயிற்சியளிப்பது. பட்டாபிஷேகத்தின்போது பாகுபலியில் பெயரை உச்சரித்ததும் நிலம் அதிர்வது. தேவசேனையின் பிரமாண்டமான ஓவியம்  போன்ற சின்னச்சின்ன  விஷயங்கள்  மனதில் நிற்கும்படி படமாக்கப்பட்டுள்ளன.

"உன் அம்மாவின் நாய் வருகிறது," ,"தேவையின்றி ஐயம் கொண்டேன் கட்டப்பா நீ நாய்தான்," "கைதியாக வருவதை விட பணிப்பெண்ணாக வருவதில் திருப்தி" ,"மதியாதார்  வாழும் தேசத்துக்கு மகிழ்மதி என்று பெயர்" , "இதுவே என கட்டளை. அதுவே என சாசனம்" போன்ற வசனங்களால் தியேட்டர் அதிர்கிறது.

லேசா ருத்ராசா, பலே பலே பகுபலி  ஒரே ஓர் ஊரில். கண்ணா நீ தூங்கடா,வந்தாய் அய்யா,. ஒரு யாகம்  ஆகிய பாடல்கள்ளை  மீண்டும் கேட்கத் தோன்றுகிறது. திரைக்கதை இயக்கம் ராஜ மெளலி,கதை ராஜமெளலியின் தகப்பன் விஜேந்திர பிரசாத்,இசை மரகதமணி தமிழ் வசனம் கார்க்கி,படத்தொகுப்பு கோத்தகிரி வெங்கடேஷ்வரராவ், ஒளிப்பதிவு செந்திகுமார், கிராபிக் காட்சிகள் வியக்கும் படியாகப் படமாக்கப்பட்டுள்ளன. வசூலில் புதுப்புது சாதனைகளை நிகழ்த்தி வருகிறது..ராஜமெளலியின் இந்த வெற்றிக்குப் பின்னால், அவரின் குடும்பம் பெரிய பலமாக இருந்து வருகிறது. அவரின் அப்பா கூறிய கதையே இதன் அடிப்படை. படத்தின் காஸ்டியூம் டிசைனர்களில் ஒருவர் அவரின் மனைவி ரமா. இசையமைப்பாளர் கீரவாணியும் ராஜமௌலியின் உறவினரே. கீரவாணியின் மனைவியான ஶ்ரீவள்ளிதான் படத்தின் லைன் புரொடியூசர். ராஜமெளலியின் மகன் கார்த்திகேயா படத்தின் இரண்டாவது யூனிட்டின் இயக்குநர்.

ராஜமெளலியின் வெற்றிக்கு அவரின் குடும்பத்தினர் அனைவரின் துணை இருந்தாலும், குறிப்பிட்ட இருவரின் பங்கு மிக முக்கியமானது.   அந்த இருவர் ராஜமெளலியின் மனைவி ரமா மற்றும் ரமாவின் சகோதரியும் படத்தின் லைன் புரொடியூசருமான ஶ்ரீவள்ளி ஆகியோர்தான். பாகுபலியின் ஆடை வடிவமைப்பாளர்கள் ரமாவும் பிரசாந்தி திப்ரினேனியும் அரசர் காலத்து கதை என்பதால், அரசர், அரசி, அமைச்சர்கள், எதிரி நாட்டு அரசன், பொதுமக்கள் என பலவித உடைகளை வடிவமைக்க வேண்டியிருந்தது. இந்த உடைகளை அவர்கள் இருவரும் மிக நுட்பமாக வடிவமைத்துள்ளனர்.

பாகுபலியின் காலத்தை மனதில் பதிய வைப்பதில் ராஜமெளலி வெற்றி பெற்றுள்ளார்.சண்டைக் கட்சிகள்  நேர்த்தியாகப் படமாக்கப்பட்டுள்ளன.  மனதை  விட்டு சிரிக்கும் கட்சிகள்  படத்துடன் ஒன்றியுள்ளன. 

பாகுபலியின் வெற்றி உலக சினிமாவை இந்தியாவின் பக்கம் திரும்பிப் பார்க்க வைத்துள்ளது.

3 ஆவது உலகப்போர்

அமெரிக்க அடையாளங்களில் ஒன்றான இரட்டைக்  கோபுரம் விமானத் தாக்குதலால் சின்னாபின்னமானபோது மூன்றாவது உலக மகா யுத்தம் ஆரம்பமாகும் என அச்சம் ஏற்பட்டது. இரட்டைக்  கோபுரத் தாக்குதலின் சூத்திரதாரி என பிலேடனை அடையாளம் கட்டியது அமெரிக்கா. பிலேடனை வேட்டையாட ஆப்கானிஸ்தானுக்குள் அமெரிக்க  நுழைந்த போது  மூன்றாவது உலக மகா யுத்தம் ஆரம்பமாகும் என கருதப்பட்டது. ஆனால், அவை எல்லாம் புஸ்வாணமானது. அமெரிக்க ஜனாதிபதியாக ட்ரம்ப் தெரிவானபோது மீண்டும் ஒரு யுத்தத்துக்கான அறிகுறி தோன்றியது. அமெரிக்காவைச் சீண்டிப்பார்க்கும் வட கொரியாவை மிரட்டுவதற்கு ட்ரம்ப் முடிவு செய்துள்ளார்.

.அமெரிக்கப் போர்க்கப்பல்கள் வட கொரியாவை நோக்கிச் சென்றுள்ளன. பிரிட்டன்,ரஷ்யா,சீனா ஆகிய  நாடுகளும் வட  கொரியாவுக்கு எதிராக வரிந்து கட்டிக்கொண்டு மிரட்டும் வகையில் போராயுதங்களை நகர்த்துகின்றன. வல்லரசு நாடுகள் அனைத்தும் நவீன வகையான ஆயுதங்களைத் தயாரிப்பதில் போட்டி போட்டு முனைப்புக் காட்டுகின்றன. தீவிரவாத அச்சுறுத்தல் உலகின் பல நாடுகளை மிரட்டுகின்றன. தீவிரவாத நடவடிக்கைகளைத் தடுப்பதில் அந்த நாடுகள் அதிக கவனம் செலுத்துகின்றன. புதிய ஆயுதங்களைத்  தயாரிக்கும் அதே  வேளை அறிமுகமாகும் புதிய ஆயுதங்களைக் கொள்வனவு  செய்வதிலும் பல நாடுகள் முனைப்புக்காட்டுகின்றன.

நாட்டின் அபிவிருத்தி,கல்வி,வளர்ச்சி ஆகியவற்றுக்கு ஒதுக்கும் பணத்தை விட அதிகமாக பாதுகாப்புக்காக ஒதுக்குவதற்கு அச்சுறுத்தலுக்கு உள்ளன நாடுகள் நிர்ப்பந்திக்கப்படுகின்றன. பயங்கரவாத நடவடிக்கையில் ஊறிப்போனவர்கள்  புதிய புதிய யுக்தியைக் கையாள்வதால் அவற்றைத் தடுக்க முடியாத நிலை உள்ளது. பொது மக்கள் சந்தோசத்தை அனுபவிப்பதற்காக கூடும் இடங்களையே தீவிரவதிகள் குறி வைக்கின்றனர். பொதுமக்கள் கூடும் இடங்களில் குறிக்கப்பட்ட நேரத்தில் வெடிக்கும் குண்டுகள், வாகனக் குண்டுகள் தற்கொலைத் தாக்குதல் போன்றவற்றைத் தவிர்த்து பொது மக்கள் கூடும்  இடங்களில் கனரக வாகனத்தை  வேகமாகச் செலுத்தி மக்களைக் கொல்லும் திட்டங்களை தீவிரவாதிகள் நடத்துகிறார்கள்.

பிரித்தானிய, ஜேர்மனி,இத்தாலி,பிரான்ஸ் ஆகிய நாடுகள் தீவிரவாதச் செயல்களால் பல மோசமான விளைவுகளைச் சந்தித்துள்ளன. எந்த நாடுகளின் எல்லைக்குள் தீவிரவாதம் ஊடுருவியுள்ளது. அமெரிக்கா, சீனா,ரஷ்யா ஆகிய நாடுகளை இருந்த இடத்தில் இருந்தபடியே வட கொரியா மிரட்டுகிறது. வட கொரியாவுக்கு எதிரான யுத்த மேகம் கருக்கட்டி உள்ளது. விமான சேவைகளை நிறுத்தும் அளவுக்கு சர்ச்சை வெடித்துள்ளது. வட கொரியாவுக்கு அமெரிக்கா அச்சுறுத்தல் விடுத்துள்ளது. பதிலுக்கு வட கொரிய அமெரிக்காவை மிரட்டுகிறது. மூன்றாவது உலக யுத்தம் வெடித்தால் அதனைத் தங்கும் சக்தி உலகின் சிறிய நாடுகளுக்கு இல்லை. யுத்தம் செய்யும் வல்லரசுகளுக்கு அருகில் உள்ள சிறிய நாடுகள் சில உலக வரைபடத்தில் இருந்து காணமல் போகும் நிலை ஏற்படும்.

வல்லரசு நாடுகளில் பலமுள்ள நாடக தன்னை நிலை நிறுத்த அமெரிக்காவும் சீனாவும் கங்கணம் கட்டியுள்ளன. அகண்டு பரந்த நாடாக இருந்த ரஷ்யா சிதறுண்டு  பல நாடுகளாகப் பிரிந்ததால் சற்று அடக்கமாக இருந்தது.  இப்போது பழைய பலத்துடன் வல்லரசின் வல்லவனாக தன்னை முதன்மைப்படுத்த முயற்சிக்கின்றது. இந்த வல்லரசு நாடுகளில் ஆசைக் கனவைக் குழிதோண்டிப் புதைப்பதற்கு வட கொரிய தயாராக இருக்கிறது.அமெரிக்காவும் ரஷ்யாவும் கடந்த மாதம் தமது  படைகளையும் இராணுவத் தளபாடங்களையும்  நகர்த்தியுள்ளன அமெரிக்கா தனது   யு.எஸ்.எஸ். எனும் நீர் மூழ்கிக் கப்பலை  கொரிய தீபகற்பத்துக்கு  அருகே நிறுத்தியுள்ளது.  விமான தாங்கிக் கப்பல் அமெரிக்காவில் இருந்து புறப்பட்டுள்ளது. அமெரிக்காவும் தென் அமெரிக்காவும்  போர் ஒத்திகை நடத்துகின்றன. இது வட கொரியாவை கோபத்தின் உச்சிக்குக் கொண்டு போயுள்ளது.

வட கொரிய தனது 85  ஆவது இராணுவ தினத்தைக் கொண்டாடி அமெரிக்காவையும் தென் கொரியாவையும் மிரட்டியுள்ளது. இதேவேளை அவுஸ்திரேலியாவின் மீது தாக்குதல் நடத்தப் போவதாக வட கொரியா எச்சரிக்கை விடுத்துள்ளது. கொரிய தீபகற்பத்தில் உள்ள அமெரிக்கப்படைத் தளங்கள் மீது அணு குண்டுத் தாக்குதல் நடத்தப் போவதாக வட கொரியா மிரட்டியுள்ளதால் அமெரிக்க பாதுகாப்பைத்  அதிகப்படுத்தியுள்ளது. ஈபனோஸ் அணு ஏவுகணைப் பாதுகாப்பை துரித கதியில் கொரிய தீபகற்பத்துக்கு அமெரிக்கா  அனுப்பி வைத்துள்ளது. ஆப்கானிஸ்தானில் குண்டுகளின் தாய் என  வர்ணிக்கப்படும் பயங்கரமான குண்டை வீசி பயங்கர வாதத்தை அடியோடு அழிக்க எதையும் செய்யத் தயார் என ட்ரம்ப் எச்சரிக்கை விடுத்தார்.

எலக்ரோ மக்னடிக் எனும் மின்காந்த அலையிலான ஆயுதம் ஒன்றை உருவாக்குவதற்கு அமெரிக்கா முயற்சி செய்வதாக வெளியான தகவலால் உலக நாடுகள் அதிர்ச்சியில் உறைந்துள்ளன.  குண்டுகளுக்குப் பதிலாக  குண்டுகள் போல் செயற்படும் மின்காந்த அலைகள் பயங்கர அழிவை ஏற்படுத்தும் வல்லமை உடையனவாகக் கருதப்படுகிறது. ஒளியை விட  ஆறு மடங்கு வேகத்தில் செயற்பட்டு   சுமார் 100   மைல் தூரம் சென்று தாக்குதல் நடத்தும் திறன் வாய்ந்தது.  இந்த ஆயுதத்தைத் தடுக்கும்  வல்லமை எந்த நாட்டுக்கும் இல்லை என அமெரிக்கா   தெரிவித்துள்ளது.

 வட கொரியாவிடம் தெர்மோ நியூ கிளியர் குண்டுகள் இருப்பதாக ஸ்பெயின் நாட்டுப் பிரஜையும் அந்  நாட்டு கெளரவக் குடிமகனும்  சிறப்புப் பிரதி நிதியுமான  பெனோஸ்  தொலைக் காட்சி ஒன்றுக்கு வழங்கிய தெரிவித்த பேட்டியில் தெரிவித்துள்ளார். உலகை  அழிப்பதற்கு மூன்று தெர்மோ நியூ கிளியர் குண்டுகள் போதும். வட கொரியாவுடன் விளையாட வேண்டாம்.ஏவுகணைகள் மூலம் தனது நாட்டைப் பாதுகாக்கும் தைரியம் ஜனாதிபதி கிம் ஜாம் உன்னுக்கு இருகிறது. வட கொரியாவுக்கு எதிரான போரில் சீனா முக்கை நுழைத்தால் பாரிய இழப்பைச் சந்திக்கும் எனவும் அவர் தனது பேட்டியில் தெரிவித்துள்ளார்.

இரண்டாவது உலக மகா யுத்தத்தின் போது ஜப்பானின் நாகசாகி,ஹிரோசிமா ஆகிய நகரங்களில் வீசப்பட்ட அணுகுண்டுகளின் தாக்கம்  இன்றும் தொடர்ந்து கொண்டிருக்கிறது. அணுகுண்டு வீசப்பட்டதால் இரண்டாவது உலக யுத்தம் முடிவுக்குக் கொண்டு வரப்பட்டது. மூன்றாவது உலகப் போர் அணுகுண்டில் இருந்து தான் ஆரம்பமாகும் என்ற பயம் மக்களிடம் தொற்றியுள்ளது. யுத்தம்  செய்வதற்கு வல்லரசுகள் தம்மைத்  தயார்ப் படுத்துகின்றன. வளர் முக நாடுகள் போரை விரும்பவில்லை.

 

இரட்டை இலைக்கு விலைபேசிய தினகரன்

    இரட்டை இலைக்கு விலைபேசிய தினகரன்

கறுப்புக் கண்ணாடி,முழுக்கைச் சட்டை, வலதுகையில் மணிக்கூடு செக்கச்செவேல் என்ற நிறம், முதுகையும் இரண்டு தோள்களையும் இணைக்கும் துண்டு, பாசமான சிரிப்பு,அன்பான அரவணைப்பு, இரட்டை  இலைச்சின்னம். என்பன  மக்கள் திலகம் எம்.ஜி.ஆரின் அடையாளங்களில் பிரதானமானவை. பிரமாண்டமான மேடயில் ஏறி மக்கள் வெள்ளத்தின் முன்னால் இரண்டு விரல்களை உயர்த்திக்காட்டி இரட்டை இலைச்சின்னத்தை  ஞாபகப்படுத்தும் அந்தக் காட்சியை நினைத்துப் பார்த்தால் எம்.ஜி.ஆரின் ரசிகர்களுக்கும் அண்ணா திராவிட முன்னேற்றக் கழகத் தொண்டர்களுக்கும் உடம்பு புல்லரிக்கும்.

திரவிட முன்னேற்றக் கழகத்தில் இருந்து வெளியேறிய  எம்.ஜி.ஆர், ஊழலற்ற, இலஞ்சம் அற்ற ஆட்சியை அமைப்பேன் என சபதம் எடுத்தார். எம்.ஜி.ஆரின் மறைவுக்குப்பின்னர் அவரின் சபதத்தை அண்ணா திராவிட முன்னேற்றக் கழகத்தவர்கள் மறந்து விட்டார்கள். ஊழலும் இலஞ்சமும் அவரால் உருவாக்கப்பட்ட கட்சிக்குள் தலை விரித்தாடியது. எம்.ஜி.ஆரின் மீது விசுவாசமும் அபிமானமும் வைத்திருந்தவர்கள் ஓரம் கட்டப்பட்டனர். எம்.ஜி.ஆரின் வாரிசாகத் தன்னை நியமித்துக் கொண்ட ஜெயலலிதா அவரின் வழியைப் பின்பற்றி கழகத்தை முன்னெடுத்துச்செல்லப் போவதாக உறுதி பூண்டார். எம்.ஜி.ஆரையும் அவரது தொண்டர்களையும் கவர்வதற்காக எம்.ஜி.ஆரைப் போன்றே  இரண்டு விரல்களை உயர்த்திக்காட்டி அரசியலில்  அரசியலில் உச்ச நிலையை எட்டினார்.

எம்.ஜி.ஆரைப் போல நடித்த  ஜெயலலிதாவால் எம்.ஜி.ஆரைப் போல  வாழத்தெரியவில்லை. வருமானத்துக்கு மீறிய அதிக சொத்துச்சேர்த்த  வழக்கில் குற்றவாளியாகி சிறை சென்ற முதலாவது முதலமைச்சர் என்ற அவப்பெயரைப் பெற்றார். ஜெயலலிதா இறந்ததும் உடன்பிறவா சகோதரி சசிகலா அந்த இடத்தைப் பிடிக்க முயற்சி செய்தார்.   சசிகலா சிறைக்குப் போகையில் தனது குடும்ப உறுப்பினரான தினகரனுக்கு கட்சியில் உயர் பதவி கொடுத்தார். சசிகலா,தினகரன் உட்பட அவரது குடும்ப உறுப்பினர்கள் அனைவரையும் கட்சியை விட்டும் தனது வீட்டைவிட்டும் ஜெயலலிதா விரட்டினார். பின்னர் சசிகலாவை மட்டும் தன்னுடன் இணைத்துக்கொண்டார். இவை எல்லாவற்றையும் தெரிந்து கொண்டும் தமது பதவியைத் தக்க வைப்பதற்காக அண்ணா திராவிட முன்னேற்றக் கழக நிர்வாகிகள் சசிகலாவுக்கும் தினகரனுக்கும்  முன்னுரிமை கொடுத்தனர்.

ஜெயலிதா மறைந்ததும் பன்னீச்செல்வத்தின் தலைமையிலும் சசிகலாவின் தலைமையிலும் கட்சி இரண்டானது. சசிகலா சிறைக்குப் போனதால் தினகரனின் அட்டகாசம் அதிகமானது. ஆர்.கே.நகர் இடைத்தேர்தல் தினகரனின் ஆட்டத்துக்கு முடிவுகட்டியது.   ஆர்.கே.நகர் இடைத்தேர்தலில் போட்டியிடுவதற்காக வேட்புமனுத் தாக்கல் செய்த பன்னீச்செல்வத்தின் ஆதரவாளரான மதுசூதனனனும்  தினகரனும் இரட்டை இலைச்சின்னத்துக்கு  உரிமை கோரியதால் அண்ணா திராவிட முன்னேற்றக் கழகத்தையும் இரட்டை இலைச்சின்னத்தையும் தேர்தல் கமிஷன் தடை செய்தது.

எம்.ஜி.ஆரின் இரட்டை இலை என்ற மாயச்சின்னத்தால்  வெற்றி பெறலாம் என்ற தினகரனின் கனவு மண்ணானது. ஆர்.கே.நகர் இடைத்தேர்தலில்  தினகரனின் ஆதரவாளர்கள் பணம் கொடுத்தது ஆதரத்துடன் நிரூபிக்கப்பட்டதால் ஆர்.கே. நகர் இடைத்தேர்தல் இரத்தானது. இரட்டை இலை இருந்தால்தான் கட்சி தனது கட்டுப்பாட்டில் இருக்கும் என்பதை உணர்ந்துகொண்ட தினகரன் இரட்டை இலையைக் கைப்பற்றுவதற்காக குறுக்கு வழியை நாடினார். தேர்தல் கமிஷனுக்கு இலஞ்சம் கொடுத்தால் இரட்டை இலையைப் பெறலாம் என யாரோ ஒருவர் ஆலோசனை  கூறியதால் இலஞ்சம் கொடுத்து இரட்டை இலையைப் பெற தினகரன் முடிவுசெய்தார். இலஞ்சத்தால்  எதையும் சாதிக்கலாம் என நினைத்த தினகரன் பொலிஸாரின் கிடுக்கிப் பிடியில் அகப்பட்டுள்ளார்.

தமிழக அரசைத் தனது கைப்பிடிக்குள் வைத்திருக்க மத்திய அரசு விரும்பியது. தினகரனின் நடவடிக்கைகள் அதற்கு முட்டுக்கட்டை போட்டன. பாரதீய ஜனதாவின் விருப்பத்தேர்வான பன்னீருக்கு எதிராக மன்னார்குடிக் குடும்பம் எடப்பாடியைக் களம் இறக்கி உள்ளது. தினகரனின் ஆட்டத்தை முடித்துவிட்டால் தமிழக அரசு அடங்கிவிடும் என மத்திய அரசு கணக்குப் போட்டது. டில்லியில் உள்ள ஹோட்டல் ஒன்றில் 1.3 கோடி ரூபாவுடன் சுகேஸ் சந்தர் என்பவரை பொலிஸார்  கைது செய்தபோது இரட்டை இலைச்சின்னத்தைப் பெறுவதற்காக தினகரன் கொடுத்த இலஞ்சம் என்ற உண்மை தெரியவந்தது. வழமை போல தொலைக்காட்சி முன்னால் புன்னகையுடன் தோன்றிய தினகரன் சுகேஸ் சந்தர் அன்பவரைத் தனக்குத் தெரியாது எனத்  தெரிவித்தார்

.

டில்லி பொலிஸாரால் விசாரணைக்கு அழைக்கப்பட்ட தினகரனால் அவர்களுடைய கேள்விகளுக்கு பதிலளிக்க முடியவில்லை. பொலிஸார் முன்வைத்த ஆதாரங்களால்  தினகரன் அதிர்ச்சியடைந்தார். விசாரணையின் முடிவில் தினகரன்,அவருடைய உதவியாளர் ஜனார்த்தனன், நண்பர்  மல்லிகார்ஜுன் ஆகியோர் கைது செய்யப்பட்டனர். ஊழல் தடுப்பு சிறப்பு நீதிமன்றத்தில் அவர்களை மேலதிக விசாரணைக்காக பொலிஸார் தம் வசம் எடுத்துள்ளனர். இதனால் அண்ணா திராவிட முன்னேற்றக் கழக உயர்மட்டத் தலைவர்கள் கதிகலங்கி உள்ளனர். அண்ணா திராவிட முன்னேற்றக் கழக நாடாளுமன்ற உறுப்பினர்களும் தமிழக அமைச்சர்களும் சட்டசபை உறுப்பினர்களும் தினகரனைக் கைவிட்டுள்ளனர். இதேவேளை விசாரணை வளையத்தில் சிக்குவோமோ என்ற பயமும் அவர்களை வாட்டி வதைக்கிறது.

இரட்டை இலைச்சின்னத்தைப் பெறுவதற்காக 60 கோடி ரூபா இலஞ்சம் கொடுக்க தினகரன் முன்வந்துள்ளது விசாரணையில் தெரிய வந்துள்ளது. இந்தப் பணம் தினகரனுடையதா? இல்லை என்றால் தினகரனுக்கு அந்தப் பணத்தைக் கொடுத்தது யார் என்ற கேள்விக்கு  சரியான பதிலை அவர் கொடுக்கவில்லை. இலஞ்சம் கொடுத்து காரியத்தைச் சாதிக்கலாம்  என்ற துணிவை தினகரனுக்கு யார் கொடுத்தது. இதற்கு முன்னர் அவர் இலஞ்சம் கொடுத்து  எத்தனைப் பெற்றுள்ளார் போன்ற கேள்விகளுக்கு விசாரணையின் முடிவில் விடை கிடைக்கும்.

 கர்நாடக மாநில  பெங்களூரைச்சேர்ந்தவர் சுகேஸ் சந்தர். மோசடி மன்னனான இவருடன் தினகரன் நீண்ட காலமாக தொடர்பில் இருந்துள்ளார். தமிழகம்,ஆந்திரா,கர்நாடகம், டில்லி,கொல்கட்டா,ஆகிய மாநிலங்களில் மோசடி செய்ததால் பொலிஸாரால் விசாரிக்கப்பட்டவர்.தமிழ்,ஆங்கிலம்,ஹிந்தி,மலையாளம் ஆகிய மொழிகளில் பேசி தான் நினைத்ததைச் சாதிக்கும் திறமை மிக்கவர்.ஆடம்பரமாக வாழ்வதற்காக  கோடிக்கணக்கில் மோசடி செய்வதே சுகேஸ் சந்தரின் பிரதான தொழில்.அடம்பர வாழ்க்கையில் மோகம் கொண்டவர். மருத்துவக்கல்லூரி மாணவியான லீனா மரியா பால் என்பவரைக் காதலித்துத் திருமணம் செய்தார். சுகேஸ் சந்தரின் மோசடிகளுக்கு அவரின் மனைவியும் உடந்தையாகச் செயற்பட்டவர். சில மலையாளப் படங்களில் நடித்த லீனா மரியா பால், தொலைக்காட்சித் தொகுப்பாளினியாகவும்  பணி புரிந்தார். சுகேஸ்  சந்தர் கைது செய்யப்படும் போது அவரிடம் இருந்து ஒன்பது சொகுசுக் கார்கள், 6.5 கோடி ரூபா பெறுமதியான பிரஸ்லற் 9 இலட்சம் பெறுமதியான கம்மல் என்பனவற்றையும் பொலிஸார் கைப்பற்றினர்.

ஆர்.கே. நகர் இடைத்தேர்தல் பணத்தால் வெற்றிபெற்று  முதல்வராகலாம் என தினகரன் நினைத்தார். இடைத்தேர்தல் இரத்தானதால் இரட்டை இலைச்சின்னத்தைப் பெற்று முதல்வராகலாம் என்ற தினகரனின் ஆசை அவரை பொலிஸ் பிடியில் சிக்க வைத்துள்ளது.