தங்க நிற ஆடையில் ரசிகர்களைக் கவர்ந்த நவோமி ஒசாகா

 பிரெஞ்சு ஓபன் போட்டியில் நவோமி ஒசாகாவின் ஜிகினாக்கள் பதிக்கப்பட்ட தங்க நிற ஆடை அனைவரின் கவனத்தையும் ஈர்த்தது. செவ்வாயன்று பிரெஞ்சு ஓபன் போட்டியில் நவோமி ஒசாகாவின் ஆடை அலங்கார ரசனை மீண்டும் அனைவரின் கவனத்தையும் ஈர்த்தது.

பரிஸில் தனது தொடக்க ஆட்டத்திற்காக, இந்த டென்னிஸ் நட்சத்திரம், விழாக்களுக்குரிய கறுப்பு நிற பாவாடை , கையில்லாத, மணிகள் பதிக்கப்பட்ட மேலாடையுடன் சுசான்-லெங்லென் மைதானத்திற்குள் நுழைந்தார். பின்னர், அந்த மேலாடையைக் கழற்றி, ஜிகினாக்கள் பதிக்கப்பட்ட தங்க நிற விளையாட்டு ஆடையை வெளிப்படுத்தினார்.

கவசத்தை நினைவூட்டும் வகையில் வடிவமைக்கப்பட்ட, அலங்கரிக்கப்பட்ட மேலாடையையும், தனது விளையாட்டு ஆடையின் மேல் ஒரு நீண்ட மடிப்புப் பாவாடையையும் அணிந்து ஒசாகா களமிறங்கினார். பின்னர், அந்த மேலாடைகளைக் கழற்றிவிட்டு, ஜெர்மன் வீராங்கனை லாரா சீகெமுண்டை 6-3, 7-6 (3) என்ற கணக்கில் தோற்கடித்தார்.

விளையாட்டு ஆடையை நைக் நிறுவனமும், மேலாடைகளை சுவிஸ் வடிவமைப்பாளர் கெவின் ஜேர்மனியரும் வடிவமைத்ததாக ஒசாகா கூறினார்.

இந்த ஆண்டின் தொடக்கத்தில் அவுஸ்திரேலிய ஓபனில், ஒசாகா அகலமான விளிம்பு கொண்ட தொப்பி, முக்காடு அணிந்து, கையில் ஒரு வெள்ளைக் குடையுடன் மேடைக்கு வந்தார். மேலும், கடந்த ஆண்டு அமெரிக்க ஓபனில், அவர் தனது சிவப்பு நிற ஆடைக்கு மேலே, குதிரைவால் கொண்டையில் பளபளப்பான சிவப்பு ரோஜாக்களை அணிந்திருந்தார். அதோடு, பில்லி ஜீன் பிளிங் என்று பெயரிட்ட, அதே நிறத்தில் ஒரு லபுபு நாயையும் வைத்திருந்தார்.

நான்கு முறை கிராண்ட்ஸ்லாம் சம்பியனான இவர், சமீபத்தில் நியூயார்க்கில் நடந்த மெட் காலா விழாவிலும் அனைவரையும் அசரவைக்கும் ஒரு ஆடையை அணிந்திருந்தார்.

போட்டிக்குப் பிறகு தனது ஆடையைப் பற்றி ஒசாகா, “இது மிகவும் உயர்தர ஆடை வடிவமைப்பு போல உள்ளது,” என்றார். “இரவில் ஈபிள் கோபுரம் ஜொலிக்கும்போது எப்படி இருக்குமோ, அதுபோலத்தான் நானும் இருப்பதாக நினைக்கிறேன்” என்றார்.