வினி ஜூனியர் அதிரடி ஸ்கொட்லாந்தை வீழ்த்திய பிறேஸில்

 உலகக்  கிண்ணத் தொடரின் குரூப் சி பிரிவில் நடைபெற்ற லீக் போட்டியில், ஸ்கொட்லாந்து அணியை 3-0 என்ற கோல் கணக்கில் வீழ்த்திய பிறேஸில் அணி, குரூப் பிரிவில் முதலிடம் பிடித்து அடுத்த சுற்றுக்கு தகுதி பெற்றுள்ளது. நட்சத்திர வீரர் நெய்மர் நீண்ட நாட்களுக்குப் பிறகு அணிக்குத் திரும்பிய இப்போட்டியில் வினிசியஸ் ஜூனியர் இரட்டை கோல்கள் அடித்து அசத்தினார்.

மியாமி மைதானத்தில் 64,478 ரசிகர்கள் முன்னிலையில் நடைபெற்ற இப்போட்டியின் 10வது நிமிடத்திலேயே வினிசியஸ் ஜூனியர் முதல் கோலை அடித்தார்.  நடப்பு உலகக்  கிண்ண  லீக் சுற்றின் அனைத்து போட்டிகளிலும் கோல் அடித்துள்ள வினிசியஸ் ஜூனியருக்கு இது 4வது கோலாகும். இதன் மூலம் தங்கக் காலணி விருதுக்கான பந்தயத்தில் மெஸ்ஸிக்கு அடுத்தபடியாக அவர் உள்ளார்.

  முதல் பாதி முடிவடைவதற்கு சற்று முன்பாக 43.3 செக்கன்களில்   வினிசியஸ் ஜூனியர் தலையால் முட்டி  இரண்டாவது கோலை அடித்தார். 60 ஆவது நிமிடத்தில்   மேதியஸ் குன்ஹா 3வது கோலை அடித்து 3-0 என்ற கணக்கில் வெற்றியை உறுதி செய்தார்.

இப்போட்டியின் போது மைதானத்தில் மிகப்பெரிய கொண்டாட்டம் கோல் அடிக்காத போதுதான் நிகழ்ந்தது. ஆட்டத்தின் இறுதி கட்டத்தில், கடந்த 2023 அக்டோபருக்குப் பிறகு காயம் காரணமாக விளையாடாமல் இருந்த 34 வயதான நெய்மர் மாற்று வீரராக களம் இறங்கினார். அவர் 10வது எண் ஜெர்சியுடன் மைதானத்திற்குள் நுழைந்த போது ரசிகர்கள் எழுந்து நின்று பலத்த கோஷமிட்டு வரவேற்றனர்.